Oader Café: Annie Martens, Gerd Constapel, Egbert Hovenkamp II

Grunnegs literair tiedschrift Oader is vanòf december 2016 ien lucht. Ien lucht want t is gain papieren tiedschrift, Oader is te lezen op internet. Net as bie veurganger Krödde hoopt redaksie dat de verhoalen en gedichten vanoet Oader heur weg vienden noar bloumlezens, bundels en bouken. Oader wil n etalage wezen van goie Grunneger schrieverij en een podium veur begunnende en gearriveerde Grunneger dichters en schrievers. Tiedens Dag van de Grunneger toal zellen n aantal dichters en schrievers dij op Oadersite publiceerd hemmen, veurlezen ien t Literair Café.

Annie Martens (Gieterveen, 1958) schrift ien t Nederlands en ien t Grunnegs, heur waark stijt ien Krödde en Roet en op Oader. Toen ze n joar of veerteg waas is ze begonnen met schrieven – veural gedichten – en ze is der nooit meer met opholden. Ze dee de schrieversvakschool ien Stad. Ien e zummer van 2018 het ze veurlezen ien de Prinsentuin. Op de koart van Leesbaar Groningen stijt heur gedicht over Kiel-Wïndeweer.

Gerd Constapel (Upgant-Schott, 1938) schrift gedichten ien t Oostfriese Nederduuts. Hij het verscheiden priezen wonnen, woaronder de Freudenthalpries ien 2003 en 2009. Zien waark stijt ien Duutse mor ok ien Grunneger tiedschriften en bloemlezengen, ien 2010 verscheen n eigen bundel: Olldagsland. Biezunder bennen zien gedichtencyclussen, bv. Middsömmeraven uut 2013. Gerd Constapel woont ien de Duutse stad Leer.

Egbert Hovenkamp II (Eext,1953) nuumt humzulf: TaalWever / TerPlekkePoeet / Be@Poet. Noast het schrieven is veural t zulf veurdroagen slim belaangriek. Ien 2008 verscheen de bundel: Kolde tocht (triantaoling van Wilhelm Müller zien tekst “Die Winterreise”) en Hovenkamp dragt veur op 2 cd’s: Músarrindill en Aarde. Gedichten stoan ien bloemlezengen en optredens, voak soamen met muzikanten as Ralph de Jongh en Spinvis, bennen op YouTube te vienden.

Foto Egbert Hovenkamp II: Lammert Aling