Oader Café – Nina Werkman, Henk Dekker, Chris Kiel

Grunnegs literair tiedschrift Oader is vanòf december 2016 ien lucht. Ien lucht want t is gain papieren tiedschrift, Oader is te lezen op internet. Net as bie veurganger Krödde hoopt redaksie dat de verhoalen en gedichten vanoet Oader heur weg vienden noar bloumlezens, bundels en bouken. Oader wil n etalage wezen van goie Grunneger schrieverij en een podium veur begunnende en gearriveerde Grunneger dichters en schrievers. Tiedens Dag van de Grunneger toal zellen n aantal dichters en schrievers dij op Oadersite publiceerd hemmen, veurlezen ien t Literair Café.

Nina Werkman (Bennewolle, 1947) schrift meest gedichten ien t Grunnegs en ien t Nederlands. Van heur verscheen ien 2009 de dichtbundel Wizzelbörg ien t Grunnegs en ien t Nederlands werden de bundels Antidata (2009) en Vrouwenwerk (2013) uutgeven. Ien 2011 won ze de Freudenthalpries veur de gedichtencyclus Gaist van törf en zolt – n Vraauwenkroniek. Ze kreeg ien 2013 de Literaire Pries van Stichten t Grunneger Bouk.

Henk Dekker (Muzzelknoal, 1960) schreef ien e joaren 80 al veur t tiedschrift Krödde mor deur verhuzerij en drokte stoekte zien schrieverij. Nou verschienen zien verhoalen weer op Oader. Over zien verhoalen zeit Henk Dekker zulf: “In veul doarvan stappen herinnerns aan minsen n verzonnen wereld in.”

Chris Kiel (Holte bij Onstwedde, 1943) schrift verhoalen en ien 2006 ston veur t eerst waark van hum ien t tiedschrift Krödde. Verder schreef er veur t tiedschrift Toal en Taiken en veur Oader. Ien 2014 verscheen zien verhoalenbundel Weerzain, woar hij de Streektoalpries van Dagblad van het Noorden veur kreeg. Chris Kiel het tot zien pensioen waarkt as leroar Nederlands.

Foto Nina Werkman: Jan Glas